Një terapi e re kundër kancerit, amivantamab, po jep rezultate premtuese në trajtimin e pacientëve me kancer të avancuar të kokës dhe qafës, ku disa prej tyre kanë përjetuar zhdukje të plotë të tumoreve. Ky ilaç vepron duke bllokuar dy receptorë kyç që ndihmojnë rritjen e qelizave kancerogjene dhe aktivizon sistemin imunitar për të sulmuar sëmundjen, duke ofruar një qasje të dyfishtë ndaj trajtimit. Studimi klinik ndërkombëtar, i zhvilluar në 11 shtete dhe me 102 pacientë, ka treguar se 42-43% e tyre kanë pasur përgjigje pozitive, ndërsa 15% kanë shënuar zhdukje të plotë të tumorit. Rezultatet janë cilësuar si një hap i rëndësishëm për pacientët me forma agresive të kancerit, ndërsa po vazhdojnë testimet në fazën e tretë klinike për të konfirmuar efektivitetin dhe sigurinë e trajtimit në një grup më të madh pacientësh.