Nga viti i ardhshëm, udhëtarët në Aeroportin Ndërkombëtar “Adem Jashari” do të kenë mundësi të furnizohen me ujë të pijshëm falas në kënde të dedikuara brenda hapësirave të aeroportit. Kjo iniciativë u njoftua nga ministrja në detyrë e Mjedisit, Fitore Pacolli, pas një takimi me drejtuesit e aeroportit dhe zëvendësministrin Driton Hyseni, ku u diskutuan edhe çështjet mjedisore dhe përmirësimi i standardeve sipas direktivave të Bashkimit Evropian. Nisma synon të rrisë cilësinë e shërbimit për udhëtarët dhe të reduktojë përdorimin e plastikës duke lehtësuar rimbushjen e enëve vetjake me ujë. Ministrja theksoi rëndësinë e bashkëpunimit ndërinstitucional dhe me operatorët ekonomikë për të krijuar një aeroport më të gjelbër dhe më miqësor ndaj mjedisit.