Zëvendëspresidenti i SHBA-së, JD Vance, dhe bashkëshortja e tij, Usha Vance, janë bërë prindër për herë të katërt me ardhjen në jetë të djalit të tyre, Alec Neel Vance, më 19 korrik në Qendrën Kombëtare Mjekësore Ushtarake Walter Reed në Maryland. Vance njoftoi lajmin në rrjetet sociale, duke theksuar se bashkëshortja dhe foshnja janë në gjendje të mirë shëndetësore, ndërsa fëmijët e tyre të tjerë janë të lumtur për vëllain e ri. Ai falënderoi personelin mjekësor të Walter Reed dhe ekipin e Shtëpisë së Bardhë për kujdesin e ofruar gjatë lindjes. Sipas Associated Press, ky është rasti i parë në më shumë se 150 vjet që një zëvendëspresident në detyrë bëhet baba gjatë ushtrimit të mandatit, një ngjarje që nuk është regjistruar që nga viti 1870.